നാല് ദിവസംമുമ്പ് ജോലിക്കെത്തിയ വീട്ടില്‍നിന്ന് മൂന്നര പവന്‍ മാല കവര്‍ന്നതിന് ഹോം നഴ്സ് അറസ്റ്റില്‍.
നാല് ദിവസംമുമ്പ് ജോലിക്കെത്തിയ വീട്ടില്‍നിന്ന് മൂന്നര പവന്‍ മാല കവര്‍ന്നതിന് ഹോം നഴ്സ് അറസ്റ്റില്‍. പുറത്തുനിന്ന് വന്നവര്‍ മുഖത്തേക്ക് മുളകുപൊടിയെറിഞ്ഞാണ് മാല കവര്‍ന്നതെന്ന് കള്ളക്കഥ ഉണ്ടാക്കിയെങ്കിലും പോലീസിന്റെ ചോദ്യംചെയ്യലില്‍ പിടിയിലാകുകയായിരുന്നു. തമിഴ്നാട് ഗൂഡല്ലൂര്‍ ചെമ്പാല എം.ജി.ആര്‍. നഗറില്‍ 33 വയസുള്ള സുഗന്ധിയെയാണ് ഗുരുവാര്‍ ടെംബിള്‍ പോലീസ് അറസ്റ്റ് ചെയ്തത്. വീടിന്റെ പരിസരത്ത് മാല കുഴിച്ചിട്ടതായി കണ്ടെത്തുകയും ചെയ്തു. താമരയൂര്‍ വരലക്ഷ്മിയില്‍ ശാന്തയുടെ മാലയാണ് മോഷ്ടിച്ചത്. മുറിയില്‍ തലയിണയ്ക്കടിയിലായിരുന്നു മാല വെച്ചിരുന്നത്. പുറത്തുനിന്നുവന്ന കള്ളന്‍ പുതപ്പില്‍ മുളകുപൊടി ചേര്‍ത്ത് ഹോം നഴ്സിന്റെ മുഖത്തേക്ക് എറിഞ്ഞശേഷം മാല കവരുകയായിരുന്നുവെന്ന് ശാന്ത പോലീസില്‍ പരാതി നല്‍കിയിരുന്നു. പെരുമാറ്റത്തില്‍ സംശയം തോന്നിയപ്പോഴാണ് ഹോംനഴ്സിനെ ചോദ്യം ചെയ്തത്. അതോടെ കുറ്റം സമ്മതിക്കുകയും ചെയ്തു. വീടിനുപിന്നിലെ മുളകുചെടിയുടെ ചട്ടിയില്‍ മാല കുഴിച്ചിട്ടിരിക്കുകയായിരുന്നു. പോലീസിന്റെ സാന്നിധ്യത്തില്‍ ഹോംനഴ്സുതന്നെ ചട്ടിയിലെ മണ്ണുമാന്തി മാല പുറത്തെടുത്തു. ഗുരുവായൂര്‍ ടെമ്പിള്‍ സി.ഐ. പ്രേമാനന്ദകൃഷ്ണന്റെ നിര്‍ദേശപ്രകാരം എസ്.ഐ. സുബ്രഹ്മണ്യന്‍, എ.എസ്.ഐ. കൃഷ്ണകുമാര്‍ എന്നിവരുടെ നേതൃത്വത്തിലായിരുന്നു അറസ്റ്റ്. പ്രതിയെ റിമാന്‍ഡ് ചെയ്തു.
